Toshkentning 12 ta tumanida yirik kutubxonalar quriladi
Prezidentning tegishli qaroriga muvofiq, Yakkasaroy tumanidagi Sharof Rashidov shohko‘chasida joylashgan “Moviy gumbazlar” xiyoboni hududida 24 soat davomida uzluksiz ishlaydigan “Kitob ko‘chasi” tashkil etiladi. Ushbu tarixiy kitob savdosi maskanining qiyofasi to‘liq tiklanib, tadbirkorlik va mutolaa madaniyati jamlangan, ochiq osmon ostida tadbirlar o‘tkaziladigan jamoat makoniga aylantiriladi.
Loyiha ko‘lami faqat markaziy xiyobon bilan cheklanib qolmaydi. Poytaxt hokimining ta’kidlashicha, shahar bo‘yicha mavjud 585 ta mahallaning barchasida bosqichma-bosqich kitobxonlik burchaklari tashkil etiladi, 12 ta tumanning har birida esa joylari aniqlab olingan yirik va shinam kutubxonalar qad rostlaydi.
Bundan tashqari, shahar bo‘ylab yangi qurilayotgan barcha yirik savdo majmualarida ularning maydoniga mos ravishda kitob do‘konlari ochish majburiy shart qilib belgilangan.
Hokimning ta’kidicha, asosiy maqsad shunchaki bino qurish emas, balki yiliga millionlab kitobxonlarni jalb qila oladigan ilmiy va ma’naviy markazlar tarmog‘ini yaratishdan iborat. Shuningdek, Prezident tashabbusining davomi sifatida shahar miqyosida o‘tkaziladigan “Eng yaxshi kitobxon” tanlovi joriy etilishi rejalashtirilgan.
