Toshkentdagi “Moviy gumbaz”da noqonuniy ta’mirlash ishlari to‘xtatildi
Ijtimoiy tarmoqlarda madaniy meros obyekti – “Moviy gumbaz” kafesida noqonuniy ta’mirlash ishlari olib borilayotgani haqida xabarlar tarqaldi. Madaniy meros agentligi holat bo‘yicha munosabat bildirdi.
Agentlik vakillari 20-iyul kuni soat 22:00 atrofida joyiga borib o‘rganish o‘tkazgan. Tekshiruv davomida obyekt tomida vakolatli organlar bilan kelishilmagan holda ta’mirlash ishlari bajarilayotgani aniqlanib, ular zudlik bilan to‘xtatildi.
Obyekt rahbarlariga madaniy meros obyektlarida har qanday ta’mirlash va qayta tiklash ishlari faqat vakolatli organning tegiishli ruxsatnomasi bilan amalga oshirilishi tushuntirilgan va rasmiy ko‘rsatma berilgan.
Ma’lumot uchun, “Moviy gumbaz” kafesi Madaniy merosning ko‘chmas mulk obyektlari milliy reystriga kiritilgan hamda davlat muhofazasiga olingan modernizm me’morchiligi namunasi hisoblanadi.
