Toshkentdagi maktabda o‘quvchiga magnitli bilaguzuk majburan yuttirilgani aytilmoqda
Ijtimoiy tarmoqlarda Toshkent shahri Yashnobod tumanidagi 151-maktabda ikki o‘quvchi boshqa bir o‘quvchiga tahdid qilib, magnitli bilaguzukni majburan yuttirgani haqida xabar tarqaldi. Bolaning onasi videomurojaatida farzandi uch soatlik murakkab operatsiyadan so‘ng reanimatsiyaga yotqizilganini aytgan.
Onaning so‘zlariga ko‘ra, qaysi sinfda o‘qishi noma’lum bo‘lgan ikki o‘quvchi uning farzandini maktab hojatxonasi oldida tutib olgan. Ular bolaga o‘ldirish bilan tahdid qilib, qarshilik ko‘rsatganiga qaramay, og‘ziga temir magnitli bilaguzukni tiqib yuborgan.
Ayolning aytishicha, farzandi qo‘rqqani sababli voqeani yaqinlariga darhol bildirmagan. Kuchli og‘riqlar boshlangach, bola shifoxonaga olib borilgan. Rentgen tekshiruvida begona jism aniqlanganidan keyin u maktabda sodir bo‘lgan voqeani aytib bergan.
“Farzandim 3 soat davom etgan murakkab operatsiyani boshdan kechirdi. Ichagi olti joyidan teshilgan. Bu teshiklarni tikishning imkoni bo‘lmagani uchun ichagining besh santimetr qismini kesib olib tashlashdi”, — degan ona.
Uning bildirishicha, magnitli buyumning bo‘laklari ichakning turli joylariga tarqalgan va operatsiya orqali olib tashlangan. Ayol murojaat vaqtida farzandi reanimatsiyada ekanini, u yerda yana to‘rt-besh kun qolishini aytgan.
“Bolamni yo‘qotib qo‘yishimga sal qolgani haqidagi o‘y meni hali ham larzaga solmoqda. Ota-onalar, befarq bo‘lmang, chunki bu sizning farzandingiz bilan ham yuz berishi mumkin”, — deya ta’kidlagan u.
Ona holatni keng yoritishni so‘rab, bolalarga nisbatan zo‘ravonlikning oldini olish va ularning xavfsizligiga jiddiy e’tibor qaratishga chaqirgan.
Holat yuzasidan hozircha rasmiy izoh berilmagan.
