Toshkentdagi 10 ta tuman hokimiga nisbatan xizmat tekshiruvi tayinlandi

Toshkent shahridagi 10 ta tuman hokimiga nisbatan xizmat tekshiruvi o‘tkaziladi. Tekshiruv Korrupsiyaga qarshi kurashish agentligining taqdimnomasida qayd etilgan vajlarni o‘rganish maqsadida tashkil etilmoqda.

2026-yil 3-avgust kuni qabul qilingan 180-14-0-F/26-sonli farmoyishga ko‘ra, xizmat tekshiruvi “Mahalliy davlat hokimiyati to‘g‘risida”gi Qonunning 6- va 21¹-moddalari, “Davlat fuqarolik xizmati to‘g‘risida”gi Qonunning 49-moddasi, Mehnat kodeksining 303-moddasi hamda Korrupsiyaga qarshi kurashish agentligining 2026-yil 22-iyuldagi 04-18/6802-son taqdimnomasi asosida o‘tkaziladi.

Xizmat tekshiruvi quyidagi tuman hokimliklarini qamrab oladi:

1. Bektemir;

2. Mirobod;

3. Mirzo Ulug‘bek;

4. Olmazor;

5. Sergeli;

6. Uchtepa;

7. Chilonzor;

8. Shayxontohur;

9. Yunusobod;

10. Yashnobod.

Farmoyish bilan xizmat tekshiruvini o‘tkazish bo‘yicha Toshkent shahar komissiyasi tarkibi ham tasdiqlandi.

Komissiya raisi etib Sh. Turdiqulov tayinlangan. Unga Agentlik taqdimnomasida qayd etilgan vajlarni xolis va sifatli o‘rganish, tekshiruv natijalari yuzasidan tegishli xulosalarni rasmiylashtirish hamda zarurat tug‘ilganda tekshiruv jarayoniga tegishli tashkilot va idoralardan mutaxassislarni jalb etish vazifasi yuklatilgan.

Farmoyishda Korrupsiyaga qarshi kurashish agentligi taqdimnomasida aynan qanday holatlar yoki vajlar qayd etilgani ochiqlanmagan.

Mazkur farmoyish ijrosini nazorat qilish Toshkent shahar hokimining komplayens va korrupsiyaga qarshi ichki nazorat bo‘yicha o‘rinbosari M. Mirxamidov zimmasiga yuklatilgan.