Toshkentda yerosti yo‘lida ayolning yo‘lini to‘sib, shimini yechgan holda quvlagan erkak qamaldi
2026-yil 6-iyul kuni jinoyat ishlari bo‘yicha Toshkent shahar Yakkasaroy tuman sudi ochiq sayyor sud majlisida shahvoniy shilqimlik sodir etgan fuqaroga nisbatan ma’muriy ishni ko‘rib chiqdi. Portal24.uz rasmiy sud hujjati bilan tanishdi.
Sud aniqladiki, 2026-yil 1-iyul kuni soat 11:00 da 1995-yilda tug‘ilgan, muqaddam ma’muriy javobgarlikka tortilgan D.N. Yakkasaroy tumani, Sh.Rustaveli ko‘chasi, 53-uy oldidagi yerosti yo‘lida fuqaro O.B. ning yo‘lini to‘sgan. Erkak kiyimini (ishtonini) yechib, ayolni quvlagan va unga nisbatan shahvoniy shilqimlik qilgan. Jabrlanuvchi holat yuzasidan “102” ishonch telefoniga qo‘ng‘iroq qilib, ariza bilan murojaat qilgan.
Sud majlisida huquqbuzar aybiga to‘liq iqror bo‘lib, qilmishidan pushaymonligini bildirdi va suddan yengillik berishni so‘ragan. Uning aybi jabrlanuvchining ko‘rsatuvi, IIO xodimining bildirishnomasi, ma’muriy bayonnoma va ish materiallari bilan to‘liq tasdiqlangan.
Sud huquqbuzarning oilaviy sharoitini inobatga olgan holda uni qamoq xarajatlarini to‘lashdan ozod etgan va Ma’muriy javobgarlik to‘g‘risidagi kodeksning 41-1-moddasi 1-qismi (Shahvoniy shilqimlik qilish) bo‘yicha 5 sutka muddatga ma’muriy qamoq jazosini tayinlagan. Jazo muddatini o‘tash 2026-yil 6-iyuldan boshlanishi belgilangan.
