Toshkentda “Yashil bekatlar”ni joriy etish taklif qilinmoqda
Partiya ma'lum qiladiki, poytaxtda jamoat transporti uchun alohida BRT yo‘laklari tashkil etilgani ijobiy qadam bo‘ldi, biroq infratuzilmani rivojlantirish faqat harakat tezligi bilan cheklanib qolmasligi lozim. Havo harorati keskin ko‘tarilgan hozirgi sharoitda Toshkentdagi aksariyat yangi bekatlarda soya va salqinlik yetarli emasligi yo‘lovchilar, ayniqsa, keksalar, bolalar va homilador ayollar uchun jiddiy noqulaylik tug‘dirmoqda.
Shu munosabat bilan Ekologik partiya shaharda 10–20 ta bekatni pilot tartibida “Yashil bekat” loyihasi asosida jihozlashni taklif etmoqda. Ushbu loyiha doirasida issiqlikni qaytaruvchi keng tom konstruksiyasi, quyosh panellari, energiya tejamkor yoritish tizimi hamda quruq iqlimga chidamli mahalliy o‘simliklar bilan ko‘kalamzorlashtirish yechimlarini sinovdan o‘tkazish ko‘zda tutilgan. Shuningdek, imkoniyatga qarab velosiped turar joylari va yomg‘ir suvini yig‘ish tizimini joriy etish ham taklif qilinmoqda.
Ushbu tashabbus poytaxtning jazirama va quruq iqlimiga moslashtirilgan bo‘lib, u nafaqat yo‘lovchilarga qulaylik yaratadi, balki shahar havosidagi changni kamaytirish va kichik yashil hududlarni ko‘paytirishga xizmat qiladi. Partiya mutasaddi tashkilotlarni yangi qurilayotgan bekatlarning iqlimga mosligini qayta ko‘rib chiqishga hamda ilg‘or ekologik yechimlarni amaliyotga tatbiq etishga chaqirgan.
