Toshkentda Tracker urib ketgan 6 yoshli bola voqea joyida vafot etdi
Mirzo Ulug‘bek tumanining Cho‘ldaraxt ko‘chasida Tracker rusumli avtomobil yo‘lga yugurib chiqqan 6 yoshli bolani bosib ketdi. “Millar” dasturining xabar berishicha, YTH 1-iyul kuni sodir bo‘lgan.
Kuzatuv kameralaridagi tasvirlarda bola yo‘l chetida to‘xtab turgan Cobalt mashinasi ortidan to‘satdan yugurib chiqqani, Tracker esa uni old va orqa g‘ildiraklari bilan bosib o‘tgani aks etgan. Bola voqea joyida vafot etgan.
Guvohlar va marhumning yaqinlari ayol haydovchi voqea sodir bo‘layotgan paytda tormozni bosmaganini va yo‘lga e’tibor qaratmaganini ta’kidlashmoqda. Mahalliy aholining so‘zlariga ko‘ra, hududda maxsus bolalar o‘yingohi yo‘qligi sababli yosh bolalar ko‘chada o‘ynashga majbur bo‘lmoqda.
Mazkur holat yuzasidan Toshkent shahar IIBB huzuridagi Tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilgan. Hozirda tergov harakatlari olib borilmoqda.
