Toshkentda ruxsatsiz ko‘p qavatli uylar qurgan va fuqarolarning uyini noqonuniy buzgan “blatnoy”ga jinoyat ishi ochildi
Ijtimoiy tarmoqlarda “New Port” turar joy majmuasi quruvchilari A.Qahhor ko‘chasidagi xonadon egalariga kompensatsiyani to‘liq bermay, ularning uyini noqonuniy buzayotgani haqida xabarlar tarqaldi.
Shahar prokuraturasi o‘tkazgan tekshiruvda “Mega Logistics Servise” MChJ mas’ullari fuqarolarni majburiy ko‘chirish bo‘yicha tegishli ijro harakatlari oxiriga yetkazilmasdan, uy-joyni o‘zboshimchalik bilan buzib tashlagani tasdiqlandi.
Bundan tashqari, ushbu kompaniya hech qanday ruxsatnomalarsiz mazkur hududda 20 qavatli bitta, 19 qavatli ikkita, shuningdek, 12 va 2 qavatli turar joy binolarini noqonuniy qurib olgani aniqlandi.
Hozirda jamiyat mansabdorlariga nisbatan jinoyat ishi qo‘zg‘atilib, Toshkent shahar prokuraturasi tomonidan dastlabki tergov harakatlari olib borilmoqda. Ishning borishi alohida nazoratga olingan.
Poytaxtda kuzatilayotgan bunday o‘zboshimchaliklarga 31-iyul kuni Prezident administratsiyasi rahbari Saida Mirziyoyeva ham keskin munosabat bildirgan edi. U Mirobod tumanidagi Lolazor mahallasida bo‘lib, “zamonaviy mahalla” binosi qurish bahonasida yashil hududlar, yosh daraxtlar va bolalar maydonchalari yo‘q qilinayotganini shaxsan ko‘zdan kechirgan.
Ilgariroq ushbu mahallada fuqaro Anatoliy Osipov uch yil davomida tuman hokimligi tarqatgan ko‘chatlarni o‘zi parvarishlab kelgani, biroq obodonlashtirish xodimlari ularni chopib tashlagani haqida shikoyat qilgan edi.
