Toshkentda ikki yo‘lovchi avtobusi to‘qnashishi oqibatida bir kishi jarohatlandi
Yunusobod tumanida 17-sonli yo‘nalishda harakatlanayotgan avtobus “Yulduz” bekatida to‘xtab turgan 85-sonli yo‘nalish elektrobusiga borib urildi. Hodisa oqibatida bir yo‘lovchi tan jarohati oldi. Bu haqda “Toshshahartransxizmat” xabar qildi.
Ma’lum qilindiki, hodisa 2026-yil 2-avgust kuni soat 08:10 atrofida Yunusobod tumanidagi Amir Temur shoh ko‘chasida sodir bo‘lgan.
17-sonli yo‘nalishda harakatlanayotgan 2-avtobus saroyiga qarashli Yutong gaz rusumli avtobus (davlat raqami 01 096 TKA) haydovchisi ehtiyotsizligi oqibatida “Yulduz” bekatida to‘xtab turgan 85-sonli yo‘nalishdagi Yutong elektrobus (davlat raqami 01 203 NKA)ning orqa qismiga urilgan.
Hodisa oqibatida “Yutong” gaz avtobusidagi bir nafar yo‘lovchi tan jarohati olgan.
Qayd etildiki, avtobus haydovchisi jarohatlangan yo‘lovchini zudlik bilan tez tibbiy yordam avtomobilida Toshkent davlat tibbiyot universiteti stomatologiya klinikasiga olib borgan. U yerda yo‘lovchiga zarur tibbiy yordam ko‘rsatilib, uyiga javob berilgan.
Yo‘l-transport hodisasi natijasida texnik shikastlangan har ikki avtobusni qayta yo‘nalishga chiqarish uchun ta’mirlash ishlari olib borilmoqda.
