Toshkentda 86 yoshli ayol uyiga qamab ketilgani aniqlandi
Ijtimoiy tarmoqlarda Toshkentda 86 yoshli qariya ayolni uyiga qamab, qarovsiz qoldirib ketilgani haqida xabarlar tarqaldi. Holat yuzasidan Bosh prokuratura rasmiy munosabat bildirdi.
Tarqalgan videolarga ko‘ra, keksa ayol 2 hafta davomida qarovsiz, och va suvsiz holda yolg‘iz qoldirib ketilgan. Uyning eshigi esa qulflab qo‘ilgan. Eshik ko‘ngilli fuqaro tomonidan ochilib, zarur yordam ko‘rsatilgan. Uning qarovchisi esa bir kun oldin kelib, uni ovqatlantirib ketganini iddao qilgan.
Bosh prokuraturaga ko‘ra, holat yuzasidan Mirzo Ulug‘bek tumani prokuraturasi tomonidan tergovga qadar tekshiruv o‘tkazilgan.
Aniqlandiki, 1940 yilda tug‘ilgan L.Juravlyova ismli nafaqaxo‘r Mirzo Ulug‘bek tumanidagi xonadonda yolg‘iz istiqomat qilib kelgan hamda sog‘lig‘i bilan bog‘liq bir qator kasalliklar sababli dispanser hisobida turgan.
Shuningdek, unga tegishli bo‘lgan xonadon 2025-yilninhg 25-sentyabrida notarial tartibda oldi-sotdi shartnomasi rasmiylashtirilib, boshqa shaxs nomiga o‘tkazilgani aniqlandi.
Tekshirish davomida uy-joyni begonalashtirish vaqtida fuqaroning o‘z harakatlarining ahamiyatini anglash va ularni boshqarish qobiliyatiga oid holatlarni, shuningdek, uning firibgarlik jinoyati qurboni bo‘lgan bo‘lishi mumkinligini aniqlash zarurligi qayd etildi. Shu munosabat bilan mazkur holat yuzasidan Jinoyat kodeksining 168-moddasi 4-qismi "a" bandi (firibgarlik) bilan jinoyat ishi qo‘zg‘atildi.
