Toshkentda 3,5 mln dollarlik kredit uchun 420 ming dollar talab qilgan bank yuristi qamoqqa olindi
Toshkent shahrida 3,5 mln dollarlik kredit uchun 420 ming dollar talab qilgan bank yuristi qamoqqa olindi. Bu haqda Davlat xavfsizlik xizmati xabar berdi.
Ma’lum qilindiki, xususiy aksiyadorlik tijorat banklaridan birining Olmazor filiali bank xizmatlari markazi yuristi va Toshkent viloyatining Yangiyo‘l tumanida yashovchi 47 yoshli muqaddam sudlangan shaxs o‘zaro til biriktirgan. Ular tadbirkorlik bilan shug‘ullanmoqchi bo‘lgan fuqaroning ishonchiga kirib, uning nomiga 3,5 mln AQSH dollari miqdorida imtiyozli kredit ajratib berishni aytgan.
Ular buning evaziga kredit summasining 12 foizini, ya’ni 420 ming AQSH dollari talab qilib, oldindan 50 ming dollar olgan vaqtlarida ashyoviy dalillar bilan ushlangan.
Hozirda ularga nisbatan jinoyat ishi qo‘zg‘atilib, qamoq ehtiyot chorasi qo‘llanildi. Tergov harakatlari olib borilmoqda.
