Toshkent viloyatioda fuqarolardan pul undirmoqchi bo‘lgan soxta prokuratura xodimi ushlandi
Toshkent viloyati Qibray tumanida prokuraturasining xodimi ekanligini aytib, o‘zidagi soxta guvohnoma bilan pul talab qilib yurgan 19 yoshli yigit ushlandi. Bu haqda bosh prokuratura xabar berdi.
Aniqlandiki, u onasiga tegishli davlat raqami 10 W 284 LB bo‘lgan Cobalt avtomashinani boshqarib yurgan vaqtda, o‘zini go‘yoki tumani prokuraturasining xodimi ekanligini aytib, o‘zidagi soxta guvohnomani ko‘rsatib yurgan. U Bosh prokuratura va YHHB xodimlari bilan Qibray tumani G‘ofur G‘ulom mahallasida o‘tkazilgan reyd tadbirlarida Cobaltni boshqarib kelayotganida to‘xtatilgan.
Shundan so‘ng u xodimlar qonuniy chora ko‘rmasligi uchun o‘zini go‘yoki Qibray tumani prokuraturasining xodimi ekanligini aytib, o‘zidagi soxta guvohnomani ko‘rsatib, javobgarlikdan qochmoqchi bo‘lgan. Unga nisbatan ma’muriy bayonnoma rasmiylashtirilib, avtomashina jarima maydonchasiga joylashtirilgan.
Avtomashina nazorat tartibida ko‘zdan kechirilgan vaqtda avtomashina o‘rindig‘idan 25 C 836 AA bo‘lgan davlat raqam belgisi aniqlangan. Hodisa joyiga tezkor-tergov guruhi chaqirilib, fuqarodan bir dona guvohnoma, bir juft davlat raqam belgisi olib qo‘yilgan.
Mazkur holat yuzasidan Jinoyat kodeksining 228-moddasi 2-qismi “b” bandi va 228-moddasi 3-qismi bilan jinoyat ishi qo‘zg‘atilib, tergov harakatlari olib borilmoqda.
Bosh prokuratura fuqarolarni ogohlantirib, o‘zini turli davlat organlari xodimi sifatida tanishtirib xizmatlar evaziga pul talab qiluvchi shaxslarga ishonmaslikni eslatgan.
