Toshkent viloyatida 1900 dan ortiq bolaning zaharlanishi ortidan sud 11 kishiga hukm o‘qidi
Toshkent viloyati sudlari matbuot xizmatining xabar berishicha, Bekobod, Buqa, Oqqo‘rg‘on, Piskent va Quyichirchiq tumanlaridagi maktabgacha ta’lim tashkilotlari tarbiyalanuvchilari ommaviy zaharlanishi bo‘yicha ochilgan jinoyat ishi doirasida 11 nafar sudlanuvchi aybdor deb topildi. Ularning barchasi Jinoyat kodeksining 257-1-moddasi 1-qismi (Sanitariya qonunchiligini yoki epidemiyaga qarshi kurash qoidalarini buzish) bilan aybli deb topilib, muayyan faoliyat bilan shug‘ullanish huquqidan mahrum etildi.
Sud hukmiga ko‘ra, eng uzoq muddatli jazo chorasi mahsulot yetkazib bergan korxona rahbarlariga tayinlandi:
3 yil-u 6 oy muddatga ozodlikdan mahrum qilish jazosi:
R. O. — “Shark Milk Product” MChJ direktori;
A. S. — “Shark Milk Product” MChJ bosh texnologi;
R. H. — “Shark Milk Product” MChJ texnologi.
3 yil muddatga ozodlikdan mahrum qilish jazosi:
S. S. — “Shark Milk Product” MChJ ta’sischisi va savdo bo‘limi menejeri;
F. O. — “Shark Milk Product” MChJ ta’sischisi va direktor o‘rinbosari;
M. N. — “Shark Milk Product” MChJ texnolog yordamchisi.
3 yil muddatga ozodlikni cheklash jazosi:
J. H. — “Governess Business” MChJ direktori;
I. S. — “Innavation Outsourcing Servise” MChJ direktori;
B. R. — “Nishon Invest” MChJ direktori;
F. D. — “Kinder Garden Group” MChJ direktori;
D. K. (ayol) — “Shark Milk Product” MChJ laboranti.
2025-yil sentyabr oyida Oqqo‘rg‘on tumanida ishlab chiqarilgan 3,2 foizli sifatsiz kefir mahsuloti tufayli Toshkent viloyatida jami 1940 nafar bola zaharlanish alomatlari bilan tibbiyot muassasalariga murojaat qilgan, ulardan 960 nafardan ortig‘i shifoxonalarga yotqizilgan edi.
Sudlanuvchilar birinchi instansiya sudining ushbu hukmi ustidan qonunda belgilangan tartibda Toshkent viloyat sudiga apellyatsiya yoki kassatsiya tartibida shikoyat qilishlari mumkin.
