Toshkent shahri Yo‘l harakati xavfsizligi boshqarmasiga yangi rahbar tayinlandi
Ushbu tayinlovga qadar Idirov IIV Yo‘l harakati xavfsizligi xizmatining Ma’muriy amaliyot bo‘limiga rahbarlik qilgan, shuningdek, Qashqadaryo va Sirdaryo viloyatlari YHXB boshlig‘i lavozimlarida faoliyat yuritgan. U yangi o‘rinda IIV Akademiyasi magistraturasiga o‘qishga kirgan Muhammad Adilovning o‘rnini egalladi. Qaror poytaxt xalq deputatlari kengashi tomonidan ma’lum qilingan.
Tayinlov bilan bir qatorda shahar kengashida poytaxt YHXBning yarim yillik faoliyati bo‘yicha hisoboti ham tinglandi. Kengash deputatlari yo‘llardagi vaziyat barqarorlashganini e’tirof etgani holda, yangi rahbariyat va boshqarma oldiga bir hafta muddatda odamlar o‘limi bilan bog‘liq yo‘l-transport hodisalarining oldini olish bo‘yicha aniq manzilli chora-tadbirlar rejasini ishlab chiqish vazifasini qo‘ygan.
Harakat xavfsizligini ta’minlash maqsadida shahar Transport va yo‘l infratuzilmasi boshqarmasi bilan hamkorlikda raqamlashtirish ishlari jadallashtiriladi. Xususan, avariyalar ko‘p sodir bo‘ladigan hududlarga qo‘shimcha kameralar o‘rnatish va boshqa haydovchilarning qoidabuzarliklarini qayd etish uchun jamoat avtobuslarini videoregistratorlar bilan jihozlash rejalashtirilmoqda.
Rasmiy statistikaga ko‘ra, joriy yilning dastlabki olti oyida Toshkentda qayd etilgan YTHlar soni 9,5 foizga kamayib, 420 tani tashkil etgan. Avariyalar oqibatida jarohatlanish holatlari ham 10 foizga qisqargan bo‘lsa-da, halok bo‘lganlar soni o‘zgarishsiz qolib, 26 nafarni tashkil qilgan. Olti oy davomida poytaxtda umumiy hisobda 3 milliondan ortiq yo‘l qoidabuzarligi fiksatsiya qilingan.
