Toshkent ilk bor dunyoning eng yaxshi talabalar shaharlari reytingiga kirdi
Britaniyaning mashhur Quacquarelli Symonds (QS) xalqaro tahlil tashkiloti navbatdagi global reyting natijalarini e’lon qildi. Unda Janubiy Koreya poytaxti Seul ketma-ket ikkinchi yil birinchilikni saqlab qolgan bo‘lsa, kuchli uchlikdan Tokio va London shaharlari joy oldi. Markaziy Osiyo mintaqasidan esa Astana 119-o‘rin, Bishkek 137-o‘rin va Toshkent 146-o‘rin bilan ushbu nufuzli ro‘yxatga kiritildi.
Oltita asosiy mezon, jumladan, universitetlar sifati, talabalar tarkibi, yashash jozibadorligi, ish beruvchilar faolligi hamda xarajatlarning hamyonbopligi asosida tuziladigan ushbu reytingga kirishning o‘ziga xos qat’iy shartlari mavjud. Unga ko‘ra, nomzod shaharda kamida 250 ming aholi istiqomat qilishi hamda so‘nggi global QS ro‘yxatidan joy olgan kamida ikkita oliygoh faoliyat yuritishi talab etiladi.
Toshkentning ushbu xalqaro darajaga ko‘tarilishi poytaxtdagi oliy ta’lim sifati va talabalar uchun yaratilgan ijtimoiy-iqtisodiy muhit xalqaro miqyosda tan olinayotganidan dalolat beradi. Bu esa kelgusida xorijiy talabalarni mamlakatimizga jalb etish imkoniyatlarini yanada oshiradi.
