Toshkent bojxonasida chaqaloq tagligiga tilla va o‘smir kiyimiga 40 ming dollar yashirganlar ushlandi
Toshkent viloyatidagi “Navoiy” chegara postidan o‘tayotgan ayollardan biri chaqaloq tagligiga 200 grammlik 2 dona tilla quymasini yashirgani aniqlandi. Shuningdek, uning yonidan yana 70 gramm zargarlik buyumlari topildi. Ushbu tillaning umumiy qiymati 450 million so‘mga baholanmoqda.
Boshqa bir holatda esa xorij fuqarosi 14 yoshli qizining kiyimlari ostiga 40 ming dollar yashirgan holda mamlakatdan chiqib ketayotganda to‘xtatib qolindi. Hozirda har ikki holat bo‘yicha bojxona surishtiruvi ketmoqda.
Bojxona qo‘mitasi fuqarolarga 100 million so‘mgacha bo‘lgan naqd xorijiy valyutani deklaratsiyasiz olib chiqish mumkinligini eslatdi. Shuningdek, voyaga yetmaganlarni huquqbuzarlikka jalb etganlik uchun ma’muriy javobgarlik va 5 yildan 10 yilgacha ozodlikdan mahrum qilish jazosi nazarda tutilgani ta’kidlandi.
