Toshkent atrofidagi issiqxonalarga 10 baravar yuqori soliq solinadi
Toshkent va uning atrofida joylashgan issiqxonalarga mol-mulk va yer solig‘i 10 baravar oshiriladi. Bu haqda jamoatchilik muhokamasiga qo‘yilgan Soliq kodeksiga o‘zgartish va qo‘shimchalar kiritish to‘g‘risidagi qonun loyihasida nazarda tutilgan.
Unga ko‘ra, Toshkent shahri hamda Toshkent viloyatining Yuqori Chirchiq, Qibray, Yangiyo‘l, Zangiota va Toshkent tumanlaridagi issiqxonalar egallagan yerlar uchun soliq stavkasi qishloq xo‘jaligi yerlari stavkasining 10 baravari miqdorida belgilanadi. Ushbu yerlarga soliq imtiyozlari tatbiq etilmaydi.
Biroq bu qoida isitish qozonxonalari demontaj qilingan hamda elektr energiyasi bilan ishlaydigan issiqxonalarga taalluqli bo‘lmaydi. Bunday ob’yektlar haqidagi ma’lumotlarni Ekologiya vazirligi taqdim etadi.
Ushbu o‘zgartishlar poytaxt va uning atrofida ekologik vaziyatni yaxshilash, issiqxonalarning salbiy ta’sirini kamaytirish hamda ularda energiya tejamkor texnologiyalarni joriy etishni rag‘batlantirish maqsadida kiritilmoqda.
