Toshkent aeroportida ikki ayolni Turkiyaga sotmoqchi bo‘lgan shaxslar ushlandi
Farg‘ona viloyati Ichki ishlar boshqarmasi hamda Davlat xavfsizlik xizmati xodimlari hamkorligida o‘tkazilgan tezkor tadbirda navbatdagi odam savdosi bilan bog‘liq jinoyatga chek qo‘yildi.
Aniqlanishicha, Pop tumanida ro‘yxatda turib, Buvayda tumanida yashagan ayol Turkiyada bo‘lgan hamda Buvaydada vaqtincha ro‘yxatda turgan tanishi bilan til biriktirib, ikki nafar mahalliy ayolni mo‘may daromad va’da qilib yo‘ldan urgan. Jabrlanuvchilar Uchko‘prik va Buvayda tumanida yashovchi fuqarolar bo‘lgan.
Guruh a’zolari ayollarga Istanbul shahriga elektron aviabiletlar olib bergan va ularni chet elga jo‘natishga uringan. Biroq huquq tartibot idoralari xodimlarining tezkor tadbiri natijasida gumonlanuvchilar Toshkent xalqaro aeroportida ayollarni olib ketayotgan vaqtda to‘xtatildi.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda. Huquq tartibot idoralari fuqarolarni xorijda ishlashda faqat qonuniy yo‘llarni tanlashga va begona shaxslarning shubhali takliflariga ishonmaslikka chaqiradi.
