Teatr arbobi va rejissyor Baxtiyor Hamidov 69 yoshida vafot etdi

Baxtiyor Hamidov umri davomida teatr va televideniye sohalarida fidokorona faoliyat yuritib, ko‘plab unutilmas sahna asarlarini yaratdi. Uning “Kuchli tuyg‘u”, “Xanuma”, “Kaftdagi yurak”, “Tobutdan kelgan ovoz”, “Avliyolar aravasi”, “Don Juan davomi”, “Maritsa”, “Aziz Pamela”, “Silindr”, “Til afsonasi”, “Oilaviy kechki ovqat” kabi spektakllari tomoshabinlar e’tiboriga sazovor bo‘lgan.

Baxtiyor Hamidov 1980-yilda O‘zbekiston davlat san’at va madaniyat institutini tugatgan. Kurs rahbari O‘zbekiston xalq artisti, professor O.A. Chernova bo‘lgan. Hattoki uning ustozlari orasida professor I.S. Gringberg, Rossiyada xizmat ko‘rsatgan san’at arbobi A.S. Kuzin va O‘zbekistonda xizmat ko‘rsatgan artist G.V. Pachis bor edi.

U O‘zbekiston kinoaktyorlar teatrining asoschisi va birinchi badiiy rahbari sifatida faoliyat yuritgan. Mustaqillik yillarida qayta tiklangan umumxalq “Navro‘z” teatrlashtirilgan bayramining ssenariy muallifi va bosh rejissyori bo‘lgan. 1990-yillarda Moskvadagi ATV va STS telekanallarida “Ivanov, Petrov, Sidorov”, “Dipkuryer”, “Avtoledi” dasturlarini sahnalashtirgan. Keyinchalik O‘zbekiston Milliy teleradiokompaniyasida “Poyte s nami!” va “Karsak” teleloyihalarining muallifi va rejissyor-sahnalashtiruvchisi sifatida ishlagan.

2019-yilgacha O‘zbekiston Davlat akademik rus teatrining badiiy rahbari lavozimida mehnat qilgan. 2023-yil 15-sentabrdan esa O‘zbekiston Davlat yoshlar teatrida rejissyor-sahnalashtiruvchi sifatida ijod qilgan.

Hozirda Baxtiyor Hamidovning o'lim sababi va tafsilotlari haqida qo'shimcha ma'lumot yo'q. Shuningdek, kasallik, baxtsiz hodisa yoki boshqa sabab haqida rasmiy xabar berilmagan.