Tazyiqqa uchraganlar uchun advokat xizmati bepul bo‘ladi
Joriy yilning 11-sentyabr kuni qabul qilingan yangi qonunchilik hujjatlariga ko‘ra, zo‘ravonlikka uchragan fuqarolar o‘z huquqlarini himoya qilish uchun surishtiruv, dastlabki tergov yoki sudga murojaat qilgan taqdirda, davlat tomonidan advokat bilan ta’minlanadi. Ushbu tizim jabrlanuvchilarning fuqarolik ishlari bo‘yicha sudlarda o‘z manfaatlarini moliyaviy qiyinchiliklarsiz himoya qilishini kafolatlaydi.
Davlat hisobidan ko‘rsatiladigan bepul yuridik yordam oilaviy va mulkiy masalalarning keng ro‘yxatini qamrab oladi. Ular orasida aliment undirish, bolalar ta’minotiga qo‘shimcha xarajatlar yig‘ish, uyga kiritish yoki turar joydan foydalanish huquqini belgilash kabi talablar bor. Shuningdek, otalikni belgilash, ota-onalik huquqidan mahrum qilish, nikohdan ajratish, mol-mulkni bo‘lish va noqonuniy egallangan mulkni qaytarib olish hamda ishga tiklash va ish haqini undirish kabi masalalar ham bepul yuridik ko‘mak doirasiga kiritildi.
Shu bilan birga, yangi tartibga asosan Ijtimoiy himoya milliy agentligiga qarashli Ayollarni reabilitatsiya qilish va moslashtirish markazlariga joylashtirilgan xotin-qizlar hamda ularning farzandlaridan alohida imtiyoz beriladi. Ularga nikoh hamda tug‘ilganlik haqidagi takroriy guvohnomalarni berganlik uchun davlat boji undirilmaydi. Qonun rasmiy e’lon qilingan kundan e’tiboran amaliyotga joriy etildi.
