Taniqli kinoaktyor Abdumannon Ubaydullayev vafot etdi
Oʻzbekistonda xizmat koʻrsatgan yoshlar murabbiysi, sanʼatshunoslik fanlari nomzodi, professor, taniqli kinoaktyor, rejissyor va pedagog Abdumannon Ubaydullayev 86 yoshida vafot etdi. Bu haqda Oʻzbekiston Kinoarboblari ijodiy uyushmasi maʼlum qildi.
1940-yilda tavallud topgan Abdumannon Ubaydullayev kinorejissyor Zulfiqor Musoqovning “Vatan” filmidagi roli bilan keng ommaga tanilgan. Shuningdek, u “Omad”, “Soʻnggi lahza”, “Hijron”, “Nazar”, “Yigit yigʻlamasin”, “Aldangan koʻngil”, “Mehr” kabi koʻplab badiiy filmlarda hamda bir qator milliy teleseriallarda rol ijro etgan.
Ijodkor umrining soʻnggi kunlariga qadar Oʻzbekiston davlat sanʼat va madaniyat institutining Ovoz rejissyorligi va operatorlik mahorati kafedrasida talaba-yoshlarga taʼlim berib kelgan.
