Talabalar diqqatiga: 1-avgustdan TTJ va vaqtincha roʻyxatdan oʻtish bitta ariza orqali amalga oshiriladi
1-avgustdan boshlab oliy taʼlim muassasalari talabalar turar joyiga (TTJ) joylashish uchun arizalar qabul qilinadi. Bu yil yotoqxonaga joylashish jarayoni soddalashtirilib, vaqtincha roʻyxatdan oʻtish xizmati bilan birlashtirildi.
Endilikda talabalar TTJga joylashish va turgan joyi boʻyicha vaqtincha roʻyxatdan oʻtishni alohida rasmiylashtirmaydi. Avval yotoqxonaga joylashgach, vaqtincha roʻyxatdan oʻtish uchun qoʻshimcha hujjatlar tayyorlab, boshqa idoralarga murojaat qilish talab etilgan boʻlsa, endi bu jarayon kompozit xizmat orqali avtomatik amalga oshiriladi.
Buning uchun talabalar my.gov.uz portali orqali “Talabalar turar joyiga joylashish uchun ariza yuborish” xizmatini tanlab, ariza topshirishi kerak. Ariza koʻrib chiqilgach, elektron shartnoma va yoʻllanma taqdim etiladi.
Shartnomada koʻrsatilgan toʻlov amalga oshirilgach, kompozit xizmat ishga tushadi va vaqtincha roʻyxatdan oʻtish uchun toʻlov shakllantiriladi. Ushbu toʻlov ham amalga oshirilgach, talabaga turgan joyi boʻyicha vaqtincha roʻyxatdan oʻtganini tasdiqlovchi qayd varagʻi beriladi.
Vaqtincha roʻyxatdan oʻtish muddati toʻlov amalga oshirilgan kundan boshlab shartnomada koʻrsatilgan muddat davomida amal qiladi.
