Suv tanqisligi va cho‘llanishga qarshi kurashda Isroil texnologiyalarini joriy etadi
Qoraqalpog‘istonning ekologiya va ta’lim sohasi vakillari hamda O‘zbekistonning Isroildagi elchixonasi xodimlari Isroilning DeserTech and Climate Innovation Center markazi bilan onlayn uchrashuv o‘tkazdi. Muloqotda cho‘llanish, suv resurslarini samarali boshqarish va qurg‘oqchilik oqibatlarini yumshatish masalalari muhokama qilindi.
Isroil tomoni murakkab iqlimiy hududlarda suvni tejash va moslashuvchan texnologiyalarni qo‘llash bo‘yicha o‘z tajribasi hamda ishlanmalarini taqdim etdi. O‘z navbatida, Qoraqalpog‘iston vakillari hududdagi ekologik vaziyatni yaxshilashga qaratilgan amaldagi loyihalar haqida ma’lumot berdi.
Muzokaralar yakunida tomonlar kelgusida qo‘shma loyihalarni amalga oshirish va hamkorlikni rasmiylashtirish uchun uch tomonlama memorandum tayyorlashga kelishib oldi.
