Surxondaryoda mil. avv. 1700–1500-yillarga oid qadimiy qabriston topildi
Surxondaryo viloyatining Sho‘rchi tumanida miloddan avvalgi 1700–1500-yillarga oid bo‘lgan, hududdagi eng qadimgi qabristonlardan biri hisoblangan Ozod yodgorligi aniqlanib, unda arxeologik tadqiqotlar olib borilmoqda. Bu haqda Madaniy meros agentligi xabar berdi.
Tadqiqotlar Y. G‘ulomov nomidagi Samarqand arxeologiya instituti hamda Xitoyning shimoli-g‘arbiy universiteti mutaxassislari hamkorligida olib borilmoqda.
Yodgorlik 2023-yilda dala-qidiruv ishlari davomida aniqlangan bo‘lib, Ozod qishlog‘ining janubi-sharqida, Dalvarzintepadan qariyb 6 kilometr uzoqlikda joylashgan.
Taxminan 200x100 metr maydonni egallagan hududda 100 ga yaqin qabr borligi aniqlangan. Joriy yil 15-avgustdan boshlangan tadqiqotlarda yodgorlikning janubi-g‘arbiy qismidagi 10 dan ortiq qabr o‘rganilmoqda.
.webp&w=3840&q=75)
Dastlabki natijalarga ko‘ra, qabrlarning tuzilishi va ulardan topilgan arxeologik ashyolar Sopolli madaniyatiga xos. Radiokarbon tahlillari va topilmalarning qiyosiy o‘rganilishi yodgorlik miloddan avvalgi 1700–1500-yillarga mansub ekanini ko‘rsatmoqda.
Mutaxassislar Ozod yodgorligini Surxondaryo havzasida aniqlangan eng qadimgi qabristonlardan biri deb baholamoqda. U mintaqadagi qadimgi dafn an’analari qanday shakllanganini o‘rganishda muhim ilmiy manba hisoblanadi.
