Surxondaryoda 11 yoshli o‘g‘lini 40 mln so‘mga sotmoqchi bo‘lgan onaga hukm o‘qildi
Surxondaryo viloyatida oiladagi moddiy qiyinchilikni bahona qilib, 11 yoshli o‘g‘lini 40 million so‘mga sotishga uringan ayolga nisbatan sud hukmi e’lon qilindi.
Sud materiallariga ko‘ra, 1993-yilda tug‘ilgan ayol moddiy manfaat ko‘rish maqsadida 2014-yilda tug‘ilgan voyaga yetmagan o‘g‘lini 40 million so‘mga sotishga kelishgan. U 2024-yil 4-aprel kuni kelishilgan pulning 20 million so‘mini olayotgan vaqtda tezkor tadbir davomida ashyoviy dalillar bilan qo‘lga olingan.
Jinoyat ishi Jinoyat ishlari bo‘yicha Termiz shahar sudida ko‘rib chiqildi. Sud majlisida ayol aybiga to‘liq iqror bo‘lib, jinoyatni og‘ir moddiy ahvoli, ko‘p qarzdorligi, uy-joyi yo‘qligi va oilasidan ajrashgani sabab sodir etganini, farzandlari yaxshi sharoitda yashashini istagani uchun bu yo‘lni tanlaganini bildirdi. Shuningdek, u qilmishidan pushaymon ekanini aytib, voyaga yetmagan ikki nafar farzandi borligini inobatga olishni so‘radi.
Sud hukmiga ko‘ra, ayol Jinoyat kodeksining 135-moddasi (odam savdosi) 3-qismi “b” bandida nazarda tutilgan jinoyatni sodir etganlikda aybdor deb topildi. Unga Jinoyat kodeksining 57-moddasi qo‘llanilib, 3 yil 6 oy muddatga ozodlikdan mahrum qilish jazosi tayinlandi. Belgilangan jazo umumiy tartibli koloniyada o‘taladi.
