Sudya bo‘lish yoshi 30 yoshga tushirilishi va 10 yillik muddat bekor qilinishi kutilmoqda
Parlament yig‘ilishida deputatlar tomonidan birinchi o‘qishda qabul qilingan “Sudyalarning maqomi to‘g‘risida”gi hujjat 7 bob va 47 moddadan iborat. Oliy sud raisi o‘rinbosari Shuhrat Polvonovning ta’kidlashicha, yosh cheklovining pasaytirilishi zamonaviy bilim va ko‘nikmalarga ega iqtidorli yosh kadrlarni sud tizimiga faolroq jalb etishga xizmat qiladi. Shu bilan birga, nomzodlarga qo‘yiladigan boshqa talablar hamda ularning mas’uliyatini oshirish mezonlari kuchaytiriladi.
Tizimda lavozimga tayinlash tartibi ham tubdan soddalashtirilmoqda. Taklifga ko‘ra, sudyalar dastlab 5 yil muddatga, ushbu davrdan so‘ng esa to‘g‘ridan-to‘g‘ri muddatsiz lavozimga saylanishi mumkin bo‘ladi. Amaldagi amaliyotda mavjud bo‘lgan ikkinchi bosqich – 10 yillik oraliq muddatni bekor qilish ko‘zda tutilgan. Shuningdek, sudyalar mustaqilligini ta’minlash barobarida ularni rotatsiya qilish va faoliyatini baholashning aniq mexanizmlari joriy etiladi.
Loyihada “iste’fodagi sudyalar” institutini shakllantirish hamda ularga professional mediator sifatida ishlash huquqini berish nazarda tutilgan. Qolaversa, Oliy sud raisiga ajratilgan shtatlar doirasida sudlar tuzilmasini belgilash hamda apparat xodimlarini ishga qabul qilish vakolati berilmoqda. Mazkur tashabbus parlamentda 125 ta ovoz bilan birinchi o‘qishda ma’qullandi va takomillashtirish jarayoni davom etmoqda.
