Subsidiya xabarnomasini olgan fuqarolar endi maqsadli ipoteka omonati ochishi mumkin
Subsidiya xabarnomasi amal qiladigan muddat ichida ishtirokchi bankda maqsadli ipoteka omonati ochiladi va fuqaro o‘z ulushini bosqichma-bosqich jamg‘aradi. Ulush to‘liq yig‘ilgach, davlat subsidiyaasi ham omonatga tushadi va bank bu pullarga bozor stavkasida foiz hisoblaydi.
Omonat 12 oygacha amal qiladi. Shu vaqt ichida birlamchi bozordan uy tanlab, ipoteka kreditini rasmiylashtirish mumkin. Kredit berilsa — omonatdagi pul, foizlar, subsidiya va kredit mablag‘i uy-joyga yo‘naltiriladi. Kredit berilmasa — fuqaroning o‘z pullari foizlari bilan qaytariladi, subsidiya esa budjetga qaytadi.
2026-yil 1-avgust holatiga 338 ta bunday omonat ochilgan bo‘lib, ularda jami 23,9 milliard so‘m jamg‘arilgan (13,8 mlrd so‘m fuqarolarniki, 10,1 mlrd so‘m subsidiya).
Bu tartib dastlabki badalni qulay jamg‘arish, foiz olish va davlat subsidiyasidan samaraliroq foydalanish imkonini beradi.
Avvalroq, 27-iyul kuni soat 15:00 dan boshlab O‘zbekistonda uy-joy sotib olish uchun ipoteka kreditlari bo‘yicha davlat subsidiyaasiga arizalar qabuli qayta ochilgandi. Bu safar arizalar joriy yil uchun avval ajratilgan, ammo amal qilish muddati ichida foydalanilmay qolgan subsidiya xabarnomalari hisobidan qabul qilinmoqda. Ya’ni, ilgari berilgan, lekin o‘z vaqtida ishlatilmagan kvotalar qayta taqsimlanib, fuqarolarga yana bir imkoniyat yaratilgan.
