Soliq qo‘mitasi soxta cheklar orqali keshbek yig‘ayotgan minglab shaxslarni reyestrga kiritdi
Soliq qo‘mitasi ijtimoiy tarmoqlarda keshbek tizimiga oid tarqalayotgan xabarlar yuzasidan munosabat bildirdi. Hukumatning tegishli qaroriga ko‘ra, “Ijtimoiy himoya yagona reyestri”ga kiritilgan shaxslar uchun go‘sht, tuxum, o‘simlik yog‘i, un, shakar, dori vositalari va tibbiy xizmatlar xaridi uchun 1 foizlik keshbek o‘rniga to‘langan QQS summasini to‘liq qaytarish tartibi joriy etilgan edi.
Biroq ayrim fuqarolar va tadbirkorlar ushbu imtiyozdan g‘arazli maqsadlarda foydalanib, soxta yoki haqiqatga to‘g‘ri kelmaydigan fiskal cheklar orqali budjetdan asossiz mablag‘ undirishga uringan.
Xususan, respublika bo‘yicha faqat may oyining o‘zida 389 ta korxonaning soxta cheklari orqali QQS qaytarib olmoqchi bo‘lgan 248,5 ming nafar (aprelda 122,1 ming nafar) shaxs shubhali xaridorlar reyestriga kiritildi. Oqibatda may oyida 83,1 mlrd so‘m (aprelda 102,5 mlrd so‘m) keshbek summasini to‘lash vaqtincha to‘xtatildi.
Aprel-may oylarida hududlar kesimida quyidagi qoidabuzarliklar qayd etildi va keshbeklar ushlab qolindi:
Navoiy viloyatida: 13 ta MChJga tegishli cheklar orqali 105 524 nafar fuqaro tomonidan ro‘yxatdan o‘tkazilgan 34,8 mlrd so‘m keshbek to‘liq to‘xtatildi;
Farg‘ona viloyatida: 5 ta MChJ cheklari orqali 95 ming nafar fuqaro tomonidan yig‘ilgan 38,3 mlrd so‘m keshbekdan 34,4 mlrd so‘mi ushlab qolindi (3,9 mlrd so‘mi to‘lovga tasdiqlandi);
Andijon viloyatida: 100 458 nafar fuqaro tomonidan ro‘yxatdan o‘tkazilgan 34,1 mlrd so‘m keshbekdan 23,8 mlrd so‘mi ushlab qolindi (5,8 mlrd so‘mi to‘lovga tasdiqlandi).
Soliq qo‘mitasi davlat keshbek tizimini bekor qilish yoki cheklash niyatida emasligini, ushbu chora tizimning adolatli va manzilli ishlashini ta’minlash hamda budjet mablag‘lari talon-taroj qilinishining oldini olishga qaratilganini ta’kidladi.
Qo‘mita fuqarolarni “Soliq” ilovasida faqat o‘zlari amalga oshirgan xaridlar cheklarini ro‘yxatdan o‘tkazishga chaqirdi. Boshqa shaxslarning cheklarini ruxsatsiz olib qo‘yish yoki soxta cheklardan foydalanish shaxsni shubhali xaridorlar reyestriga kiritilishiga sabab bo‘ladi.
