Soliq qo‘mitasi iyun oyi uchun 112 mlrd so‘m keshbek tasdiqladi, 96 ming kishi esa “qora ro‘yxat”ga tushdi
Iyun oyi uchun hisoblangan keshbek to‘lovlarining asosiy qismi tasdiqlandi. Qolgan mablag‘lar esa tadbirkorlik subyektlari o‘z soliq hisobotlarini topshirib, qarzdorliklarini uzganidan so‘ng bosqichma-bosqich fuqarolarning kartalariga o‘tkazib beriladi.
Amaldagi tartibga muvofiq, xaridorlar xarid summasining 1 foizi (oyiga ko‘pi bilan 247,2 ming so‘mgacha) miqdorida keshbek olishi mumkin. Biroq chek 10 kundan kech ro‘yxatdan o‘tkazilsa, avtomobil, aviachipta, aloqa va kommunal xizmatlar hamda raqamli platformalar orqali rasmiylashtirilgan to‘lovlar uchun keshbek to‘lanmaydi.
Shuningdek, Soliq qo‘mitasi iyun oyida 96 mingdan ziyod fuqaro shubhali xaridorlar reyestriga tushganini bildirdi. Mazkur shaxslar ijtimoiy tarmoqlar orqali o‘zgaga tegishli yoki soxta cheklarni haq evaziga olib, ilovadan o‘tkazgani aniqlangan. Idora fuqarolarni faqat shaxsiy xaridlarga oid haqiqiy cheklarni ro‘yxatdan o‘tkazishga chaqirib, soxta cheklardan foydalanish javobgarlikka sabab bo‘lishidan ogohlantirdi.
