Soliq qoidabuzarligi haqida xabar berganlar yarim yilda 20,2 mlrd so‘m ishlab topdi
Soliq qo‘mitasi ma’lumotlariga ko‘ra, 2026-yilning yanvar–iyun oylarida “Soliq Mobile” ilovasi orqali soliq huquqbuzarliklari bo‘yicha 63 714 ta murojaat kelib tushgan.
Murojaatlarning asosiy sabablari:
• 51 974 tasi — xarid cheki berilmagani;
• 9 456 tasi — boshqa turdagi huquqbuzarliklar;
• 2 149 tasi — to‘lovni plastik karta orqali qabul qilmaslik;
• 135 tasi — karta orqali to‘lovda xarid summasini oshirish.
Shikoyatlar asosida 41 687 ta sayyor soliq tekshiruvi o‘tkazilib, 99,5 foiz holatda huquqbuzarliklar o‘z tasdig‘ini topgan. Natijada 31 174 ta holat bo‘yicha fuqarolarga 20,2 milliard so‘m mukofot ajratildi. Murojaatlarning 19 040 tasi takroriy bo‘lgani yoki tekshiruv davom etayotgani sababli ko‘rib chiqilmagan.
Eng ko‘p mukofot puli Toshkent shahri aholisiga to‘langan — 4,42 milliard so‘m. Eng kam ko‘rsatkich esa Sirdaryo viloyatida qayd etilgan — 1,05 milliard so‘m.
Ma’lumot uchun, 2025-yilda soliq huquqbuzarliklari haqida xabar bergan fuqarolarga jami 33,7 milliard so‘m mukofot berilgan.
