Sirdaryoda harakatlanayotgan Cobalt’dan o‘zini tashlagan 24 yoshli yigit vafot etdi

Voqea 30-iyun kuni Sirdaryo tumani Matonat mahallasi Gulobod ko‘chasidan o‘tuvchi ichki mahalliy yo‘lida haydovchi Umidjon Navruzov Cobalt avtomobilini boshqarib ketayotganida sodir bo‘lgan.

Dastlabki ma’lumotlarga ko‘ra, avtomobilning old yo‘lovchi o‘rindig‘ida ketayotgan haydovchining qarindoshi — Asadbek Bo‘riboyev bir necha bor uyiga, Jizzax viloyati Do‘stlik tumanidagi doimiy yashash manziliga bormoqchi ekanini aytib, avtomobilni to‘xtatishni so‘ragan. Biroq haydovchi transportni to‘xtatmagan. Shundan so‘ng yo‘lovchi old eshik orqali o‘zini avtomobildan tashlagan va og‘ir tan jarohatlari olgan. Marhumning amakisi “Daryo”ga bildirishicha, ular Toshkentdan Jizzaxga ketayotgan bo'lgan. Shuningdek, qarindoshlari Bo’riboyev mast holda old o'rindiqda ketayoganini qayd etgan.

Jabrlanuvchi ko‘rsatilgan tibbiy muolajalarga qaramay, Sirdaryo tumani tibbiyot birlashmasida 30-iyun kuni soat 06:55 da vafot etgan.

Sud-tibbiyot ekspertizasining 2026-yil 14-iyuldagi 42-sonli xulosasiga ko‘ra, marhumning o‘limiga yo‘l-transport hodisasi oqibatida avtomobildan tushib ketib urilishi natijasida yuzaga kelgan bosh miyaning og‘ir ochiq jarohati, miya lat yeyishi, kalla asosi suyagining sinishi, miya shishi, og‘ir darajadagi miya komasi hamda og‘ir yurak va nafas yetishmovchiligi sabab bo‘lgan.

Marhum Asadbek Bo‘riboyev oliy ma’lumotli, bo‘ydoq, muqaddam sudlanmagan, mavsumiy ishchi bo‘lib, Jizzax viloyati Do‘stlik tumanida yashagan.

Avtomobilni boshqargan 46 yoshli Umidjon Tadjiboyevich Navruzov Sirdaryo tumanida yashaydi. U o‘rta ma’lumotli, oilali, uch nafar farzandning otasi hisoblanadi.

Mazkur holat yuzasidan Sirdaryo tumani prokuraturasi tomonidan tergovga qadar tekshiruv harakatlari olib borilmoqda.