Sirdaryoda bankomatni buzib, ichidan pullarni olishga uringan 18 yoshli yigit qo‘lga olindi
Sirdaryo viloyatining Guliston tumanida 12-sentabr kuni bankomatni bolta bilan buzib, ichidagi pullarni olishga uringan 18 yoshli yigit qo‘lga olindi. Bu haqda viloyat IIB xabar berdi.
Guliston tumani “Oltin vodiy” MFY Komiliy ko‘chasida joylashgan “Inkassatsiya xizmati” MChJga qarashli bankomatdan Sirdaryo viloyati IIB huzuridagi Qo‘riqlash xizmati monitoring markaziga tashvish signali kelib tushgan.
Signal qabul qilingach, ma’lumot Guliston tumani IIB huzuridagi Qo‘riqlash xizmati tezkor harakatlanuvchi guruhiga yetkazilgan va xodimlar voqea joyiga yo‘l olgan.
Hodisa joyiga yetib kelgan xodimlar bankomat oldida yuzini berkitgan va qo‘liga qo‘lqop kiygan shaxsni ko‘rgan. U bolta va boshqa ashyolar yordamida bankomatning tashqi qismini buzishga urinayotgan bo‘lgan.
Qo‘riqlash xizmati xodimlarini ko‘rgan shaxs voqea joyidan qochishga uringan. Biroq tezkor guruh xodimlari tomonidan qo‘lga olingan.
Tekshiruv davomida uning Guliston tumanida yashovchi, 2008-yilda tug‘ilgan D.S. ekani aniqlangan. U belgilangan tartibda Guliston tumani IIB binosiga olib kelingan.
Hozirda mazkur holat yuzasidan surishtiruv ishlari olib borilmoqda.
