Shveysariya sudi Gulnora Karimova ishini tugatdi. Lombard Odier xususiy banki jarimaga tortildi
Kecha, 27 iyul kuni Shveysariya sudi Lombard Odier xususiy bankini pul yuvishning oldini ololmagani uchun 3 million shveysariya franki (3,68 million dollar) miqdorida jarimaga tortdi, ammo Gulnora Karimovaga nisbatan sud jarayonini to‘xtatdi. Bu haqda “Reuters” xabar berdi.
Shveysariya sudi birinchi prezidenti Islom Karimovning qizi Gulnora Karimovaga oid pul yuvish ishi doirasida xususiy Lombard Odier bankini pul yuvishning oldini olishga qaratilgan choralarni yetarli deb baholamadi va 3 million Shveysariya franki miqdorida jarimaga tortdi.
Sud, shuningdek, bankka aloqador 400 million Shveysariya frankidan ortiq aktivlarni musodara qilish haqida ham qaror chiqardi. Bankning sobiq hisob menejerlaridan biri esa 24 oylik shartli qamoq jazosiga hukm qilindi.
Shveysariya prokuraturasi Gulnora Karimovani 2005–2013-yillar oralig‘ida pora olish va “The Office” deb nomlangan jinoiy tuzilma orqali yuzlab million dollarni Shveysariyadagi bank hisoblariga o‘tkazishda ayblagan edi. Mazkur ish bo‘yicha sud jarayoni 2026-yil aprel oyida boshlangan.
Biroq sud Gulnora Karimovaga nisbatan ishni tugatdi. Qarorda uning da’vo muddati tugashidan oldin ozod etilishi yoki Shveysariyaga ekstraditsiya qilinishi ehtimoli yo‘qligi sabab qilib ko‘rsatildi.
Lombard Odier banki esa ushbu ish 2012-yilda o‘zi Shveysariya organlariga shubhali operatsiyalar haqida xabar berganidan keyin boshlanganini bildirib, o‘sha davrda pul yuvishga qarshi zarur nazorat tizimlari mavjud bo‘lganini ta’kidladi. Bank sud qarori ustidan apellyatsiya shikoyati berishini ma’lum qildi.
