Scopus bo‘yicha O‘zbekistonning eng yetakchi 10 nafar olimi ma’lum bo‘ldi
Olimlarning ilmiy mahsuldorligi va mehnatlarining e’tirof etilish darajasini ko‘rsatuvchi h-indeksi bo‘yicha birinchi o‘rinni marhum akademik Behzod Yo‘ldashev egalladi. 2024-yilda vafot etgan olimning h-indeksi 56 ga teng bo‘lib, uning 329 ta maqolasiga xalqaro ilmiy hamjamiyat tomonidan 7 177 marotaba iqtibos keltirilgan. Bu uning ilmiy merosi hanuzgacha jahon ilm-fanida yuqori qiymatga ega ekanini ko‘rsatadi.
Ro‘yxatning keyingi o‘rinlarini 11 954 ta iqtibos hamda 55 h-indeks ko‘rsatkichi bilan Dilfuza Egamberdiyeva hamda 54 h-indeks va 9 419 ta iqtibos bilan Bobomurod Ahmedov band etgan. Shuningdek, kuchli beshlikdan 241 ta maqola va 51 h-indeksga ega Ahmadjon Abdujabborov hamda 301 ta ilmiy ishi bilan 42 h-indeksga erishgan Farruh Atamurotov joy oldi.
Reytingning davomida Dilshat Tulyaganov (h-index 41), Valentin Popov (h-index 38), Elyor Berdimurod (h-index 38), Javlon Rayimbayev (h-index 36) hamda Elvir Axmetshin (h-index 35) kabi tadqiqotchilar qayd etilgan. Ma’lumot uchun, h-indeks ko‘rsatkichi olimning nafaqat chop etgan maqolalari sonini, balki ularning sifat va ommaboplik darajasini ham birdek baholovchi xalqaro mezon hisoblanadi.
