Samarqandda VIII asrga oid hukmdorlar saroyi va haykaltaroshlik namunalari topildi
Samarqand viloyati Jomboy tumanida joylashgan Mingtepa arxeologik yodgorligida VIII asrga oid hukmdorlar saroyining me’moriy qoldiqlari topildi. Bu haqda Madaniy meros agentligi ma’lum qildi.
Tadqiqotlar Samarqand arxeologiya instituti ilmiy xodimlari Amriddin Berdimurov, Husniddin Rahmonov va Nigora Mahkamovalar tomonidan olib borilmoqda. Qazishmalar natijasida yodgorlikning Ark (qal’a) qismida joylashgan saroy majmuasining me’moriy tuzilishi ochildi.
Mutaxassislarning ta’kidlashicha, inshootning qurilish uslubi ilk asrlar davri shaharsozligi, me’morchiligi hamda davlat boshqaruv tizimini o‘rganishda muhim manba hisoblanadi.
Shuningdek, saroyning zal qismidan VIII asrga oid haykaltaroshlik namunalari ham topilgan bo‘lib, hozirda ular bo‘yicha ilmiy tadqiqotlar o‘tkazilmoqda. Arxeologlar ushbu topilmalar hududning ilk asrlardagi siyosiy va madaniy hayotini o‘rganishda yangi bosqichni ochishini ta’kidlamoqda.
