Samarqandda harakatlanayotgan yuk mashinasi yonib ketdi, haydovchi halok bo‘ldi
Samarqand viloyatining Nurobod tumanida harakatlanayotgan MAN rusumli yuk avtomobilida yong‘in chiqishi oqibatida YTH sodir bo‘ldi. Bu haqda viloyat yo'l harakati xavfsizligi boshqwarmasi xabar berdi. Hodisa natijasida haydovchi voqea joyida halok bo‘lgan.
Dastlabki ma’lumotlarga ko‘ra, hodisa 6-avgust kuni soat 16:00 atrofida Nurobod tumani Mehnatkash mahallasi hududidan o‘tuvchi A-378 avtomobil yo‘lining 35-kilometrida, Samarqand–Qashqadaryo yo‘nalishida yuz bergan.
Qayd etilishicha, harakatlanib ketayotgan MAN rusumli yuk transporti kabinasining salon qismida to‘satdan yong‘in kelib chiqqan. Haydovchi transport vositasini to‘xtatishga uringan, biroq boshqaruvni yo‘qotib, yo‘lning chap tomonidagi beton to‘siqqa urilgan. Shundan so‘ng yuk mashinasi ag‘darilgan.
YTH oqibatida haydovchi og‘ir tan jarohatlari olib, voqea joyining o‘zida vafot etgan.
Mazkur holat yuzasidan Nurobod tumani IIB Tergov bo‘limi tomonidan jinoyat ishi qo‘zg‘atilib, tergov harakatlari olib borilmoqda.
