Samarqandda elektr korxonasi rahbari, Toshkentda o‘qishga kiritishni va’da qilgan firibgar pora bilan qo‘lga olindi
Davlat xavfsizlik xizmati turli hududlarda korrupsiya va firibgarlik bilan bog‘liq ikki holatga chek qo‘ydi. Ulardan birida Samarqand viloyatida tuman elektr ta’minoti korxonasi rahbari tadbirkordan elektr tarmog‘iga noqonuniy ulanish oqibatida yetkazilgan 393 mln so‘mlik zarar bo‘yicha jinoiy javobgarlikka tortmaslik va zarar miqdorini kamaytirib ko‘rsatish evaziga 5 ming AQSH dollari talab qilgan.
U avval 4 ming dollar, qolgan 1 ming dollarni esa uchinchi shaxs orqali olayotgan vaqtida DXX va Bosh prokuratura huzuridagi Departament xodimlari tomonidan ushlandi. Ma’lum bo‘lishicha, mansabdor shaxs ilgari ham sudlangan.
Yana bir holatda, Toshkent shahrida muqaddam sudlangan shaxs tanishlari orqali fuqaroni Toshkent davlat iqtisodiyot universitetiga o‘qishga kiritib qo‘yishni va’da qilib, buning evaziga 20 ming AQSH dollari talab qilgan.
U oldindan 13 ming dollar olayotgan vaqtida DXX hamda Iqtisodiy jinoyatlarga qarshi kurashish departamenti xodimlari tomonidan ashyoviy dalillar bilan qo‘lga olingan.
Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
