Saida Mirziyoyeva yana bir lavozimga tayinlandi
Prezident farmoniga muvofiq, yangi boshqaruvchi Moliya markazi kengashining Bosh kotibi hisoblanadi. U kengash majlislari kun tartibini shakllantiradi hamda rais ishtirok etmagan yig‘ilishlarga raislik qilish vakolatiga ega bo‘ladi. Mirziyoyevaning asosiy vazifalaridan biri ushbu xalqaro tuzilma faoliyatini samarali yo‘lga qo‘yish, dastlabki me’yoriy hujjatlarni tayyorlash hamda davlat idoralari va Markaz bo‘linmalari o‘rtasida hamkorlikni o‘rnatishdan iborat.
Shuningdek, boshqaruvchiga Toshkent xalqaro moliya markazi nomidan mamlakat ichida va xorijda xalqaro tashkilotlar, xorijiy investorlar hamda sheriklar bilan muzokaralar olib borish mas’uliyati yuklatildi. Kadrlar siyosatida ham u muhim vakolatlarga ega bo‘lib, Markaz ma’muriyatining ijrochi direktori, uning o‘rinbosarlarini tayinlaydi hamda Moliyaviy xizmatlar boshqarmasi rahbariyati bo‘yicha takliflar kiritadi.
Bundan tashqari, Saida Mirziyoyeva Moliya markazi faoliyatini kengaytirish maqsadida turli bitimlar tuzish, soha mutaxassislaridan iborat ishchi guruhlar tashkil etish hamda xalqaro ekspertlarni ishga jalb qilish huquqiga ega bo‘ldi.
