Saida Mirziyoyeva pedofillar uchun o‘lim jazosi qo‘llanishi tarafdori ekanini bildirdi
Prezident Administratsiyasi rahbari Saida Mirziyoyeva Namangan viloyatining Uchqo‘rg‘on tumanidagi bog‘chada voyaga yetmagan bolaga nisbatan sodir etilgan og‘ir jinoyat yuzasidan munosabat bildirdi.
U shaxsan o‘zi shunday mudhish jinoyatlar uchun o‘lim jazosi tarafdori ekanini, biroq amaldagi qonunchilikda bu jazo turi ko‘zda tutilmagani sababli, pedofillar uchun javobgarlikni maksimal darajada kuchaytirishga qaratilgan yangi qonunchilik taklifi tayyorlanayotganini ta’kidladi. Mirziyoyevaning bildirishicha, tegishli idoralarga ko‘rsatmalar berilgan bo‘lib, nafaqat jinoyatchining o‘zi, balki beparvoligi sababli bolaning xavfsizligini ta’minlay olmagan mas’ul shaxslar harakatlariga ham huquqiy baho berilishi shart.
Uchqo‘rg‘on tumanidagi davlat maktabgacha ta’lim muassasasida yuz bergan ushbu holat yuzasidan Jinoyat kodeksining 118-moddasi (nomusga tegish) hamda 112-moddasi (o‘ldirish yoki zo‘rlik ishlatish bilan qo‘rqitish) bo‘yicha jinoyat ishi qo‘zg‘atilgan. Olib borilgan tezkor harakatlar natijasida bir nafar gumonlanuvchi qamoqqa olingan.
Ishning jiddiyligi e’tiborga olinib, tergov jarayoni Namangan viloyati prokuraturasi ish yurituviga o‘tkazildi hamda nazorat bevosita Bosh prokuror tomonidan shaxsiy mas’uliyatga olindi. Nazorat organi jinoyatni yashirishga uringan yoki o‘z vazifasiga mas’uliyatsizlik bilan qaragan har bir mansabdor shaxs qonun oldida javob berishini bildirdi.
