“Ravshan Zolotoy” Interpol qidiruvidan nega olib tashlandi? IIV rasmiy izoh berdi
“Ravshan Zolotoy” nomi bilan tanilgan Ravshan Muhitdinovga nisbatan javobgarlikka tortish muddati o‘tgani munosabati bilan jinoyat ishining unga nisbatan bo‘lgan qismi tugatilgani sabab qidiruv bekor qilindi. Bu haqda Ichki ishlar vazirligi tomonidan o‘tkazilgan matbuot anjumanida ma'lum qilindi.
“Ravshan Zolotoy”ga nisbatan Jinoyat kodeksining 173-moddasi 3-qismi (Mulkni qasddan yo‘q qilish yoki shikastlash) 242-qism 2-qismi (jinoiy uyushma tashkil etish), 277-moddasi 3-qismi (bezorilik) bilan ayblov qo’yilgan edi.
Toshkent shahar IIBB boshlig‘i o‘rinbosari polkovnik Dilmurod Mirsodiqov “Ravshan Zolotoy”ga nisbatan qidiruv 2021-yilgi holat bo‘yicha ochilgan jinoyat ishi doirasida e’lon qilinganini qayd etdi.
“Haqiqatdan, 2021-yilgi holat bo‘yicha jinoyat ishi qo‘zg‘atilib, tegishli moddalar bilan ‘Ravshan Zolotoy’ga nisbatan qidiruv e’lon qilingan edi. Vaqt o‘tgandan keyin javobgarlikka tortish muddati o‘tgani munosabati bilan jinoyat ishining unga nisbatan bo‘lgan qismi tugatildi”, – dedi Mirsodiqov.
Shuningdek, Mirsodiqov bir qator tergov harakatlari o‘tkazilganidan keyin “Ravshan Zolotoy”ga nisbatan boshqa arizalar ham kelib tushgani sabab holat bo‘yicha yana qidiruv harakatlari jadallashtirilgani qo‘shimcha qilindi. Barcha tergov harakatlari o‘tkazilganidan keyin uning boshqa ayblovi tasdiqlanmaganidan keyin qolgan qidiruv harakatlari bekor qilingan.
37 yoshli Ravshan Muhiddinov 2007-yilda uyushgan jinoiy guruh tuzish va unga rahbarlik qilish (Jinoyat kodeksining 242-moddasi) ayblovi bilan xalqaro qidiruvga berilgan. U 2009-yildan 2012-yilgacha Istanbulning Maltepe qamoqxonasida, 2013-yilda esa Dubayning Al-Avir qamoqxonasida saqlangan. Har ikki holatda ham O‘zbekiston tomoni ilgari surgan ayblovlar o‘z isbotini topmagani uchun u ozod etilgan.
