Quyosh panellari o‘rnatgan 68,6 ming fuqaroga 330,8 mlrd so‘mdan ortiq subsidiya ajratildi
2026-yilning yanvar—iyun oylarida “Quyoshli xonadon” dasturi doirasida 68,6 ming nafar jismoniy shaxsga davlat budjetidan jami 330,8 mlrd so‘mdan ortiq subsidiya to‘lab berildi. Bu haqda Soliq qo‘mitasi ma’lum qildi.
Ma’lumotlarga ko‘ra, eng katta subsidiya mablag‘lari Buxoro, Xorazm va Qashqadaryo viloyatlariga to‘g‘ri kelgan. Xususan, Buxoro viloyatida 61,9 mlrd so‘m, Xorazm viloyatida 60,5 mlrd so‘m, Qashqadaryo viloyatida esa 37,3 mlrd so‘m subsidiya ajratilgan.
Shuningdek, Qoraqalpog‘iston Respublikasida 38,9 mlrd so‘m, Navoiy viloyatida 25,3 mlrd so‘m, Farg‘ona viloyatida 22 mlrd so‘m, Toshkent shahrida 18 mlrd so‘m va Samarqand viloyatida 17,9 mlrd so‘m subsidiya to‘langan.
Eslatib o‘tamiz, 2023-yil 1-apreldan boshlab “Quyoshli xonadon” dasturi doirasida xonadoniga quyosh panellarini o‘rnatgan jismoniy shaxslarga yagona elektr energetika tizimiga uzatilgan har bir kilovatt-soat elektr energiyasi uchun 1 ming so‘mdan subsidiya ajratilishi belgilangan.
