Quvaning so‘kong‘ich hokimiga chora ko‘rildi
Farg‘ona viloyati Quva tumani hokimi Halimjon Umarovning fermerlar bilan o‘tkazilgan yig‘ilishda davlat fuqarolik xizmatchisiga qo'pol munosabatda bo'lib, haqoratlagani yuzasidan unga “hayfsan” jazosi qo'llanildi. Bu haqda Korrupsiyaga qarshi kurashish agentligi xabar berdi.
Qayd etildiki, agentlik tomonidan davlat xizmatchilari tomonidan odob-axloq qoidalari buzilishining oldini olishga qaratilgan ishlarni muvofiqlashtirish vakolati doirasida viloyat hokimligiga holat yuzasidan qonunchilikda belgilangan tartibda xizmat tekshiruvi o‘tkazish hamda huquqiy baho berish bo‘yicha taqdimnoma kiritdi.
Taqdimnoma natijalariga ko‘ra, tumani hokimi Halimjon Umarovga nisbatan “hayfsan” intizomiy jazosi qo‘llanildi.
Eslatib o‘tamiz, O‘zbekiston Respublikasi Ma’muriy javobgarlik to‘g‘risidagi kodeksining 41-moddasiga ko‘ra, shaxsni haqorat qilish ma’muriy javobgarlikka sabab bo‘lib, bunday qilmish uchun 20 BHMdan 40 BHMgacha jarima belgilangan.
Ayni paytda Quva tumani hokimining xatti-harakatiga nisbatan mazkur modda asosida ma’muriy ish qo‘zg‘atilgan yoki yo‘qligi ma’lum emas. Holat yuzasidan Ichki ishlar vazirligi tomonidan hozircha rasmiy izoh berilmagan.
