Qumqo‘rg‘onda 9 yoshli qizining og‘ziga majburlab tezak solgan ota qamaldi
Ijtimoiy tarmoqlarda ota o‘zining voyaga yetmagan qiziga nisbatan shafqatsiz munosabatda bo‘lgani aks etgan video tarqaldi. Surxondaryo viloyati IIB xabariga ko‘ra, hodisa Qumqo‘rg‘on tumanining “Xo‘jaqishloq” mahallasida sodir bo‘lgan.
Joriy yilning 25-iyul kuni tuman IIBga murojaat qilgan ayol turmush o‘rtog‘i Ch.B. (1993-yilda tug‘ilgan) 9 yoshli qizini jazolash bahonasi bilan qiynagani va og‘ziga majburan hayvon tezagini solganini ma’lum qilgan. Aniqlanishicha, tarmoqlarda tarqalgan ushbu mudhish tasvirlar 2025-yilning 30-dekabrida tasvirga olingan.
Holat yuzasidan Qumqo‘rg‘on tumani IIB Tergov bo‘linmasi tomonidan gumonlanuvchiga nisbatan Jinoyat kodeksining 110-moddasi 2-qismi "a" bandi (voyaga yetmagan shaxsni qiynash) bilan jinoyat ishi qo‘zg‘atildi. Gumonlanuvchi Ch.B. protsessual tartibda qamoqqa olindi, tergov davom etmoqda.
