Qozog‘istonda YTHda halok bo’lgan uch o‘zbekistonlikning jasadi ortga qaytarildi
22-avgust kuni Qozog‘istonning Qizilo‘rda viloyatidan o‘tuvchi Shimkent–Samara avtomobil yo‘lining Aqsay hududida sodir bo‘lgan yo‘l-transport hodisasida halok bo‘lgan O‘zbekiston fuqarolari ortga qaytarildi. Bu haqda “Dunyo” xabar berdi.
Ma’lumotlarga ko‘ra, hodisa oqibatida uch nafar O‘zbekiston fuqarosi voqea joyida halok bo‘lgan. Mahalliy huquqni muhofaza qiluvchi idoralarning dastlabki maʼlumotlariga ko‘ra, hodisa Nexia-2 haydovchisi rul boshqaruvida uxlab qolishi oqibatida KamAZ bilan to‘qnashgan bo‘lishi mumkin.
O‘zbekistonning Olmaota shahridagi Bosh konsulxonasi va Migratsiya agentligi tomonidan halok bo‘lgan fuqarolarning jasadlarini Vatanga tezkor qaytarish uchun zarur hujjatlar rasmiylashtirildi. Shuningdek, halok bo‘lgan uch kishining jasadi doimiy yashash joyi – Toshkent viloyatining Bekobod shahriga o‘z vaqtida yetkazish masalasi Qozog‘istonning vakolatli idoralari bilan hal etildi.
