“Qoningni ichaman!”. Surxondaryoda yangi rahbar ta’tildagi xodimni majburiy ishga jalb qilib, unga tahdid qilgani aytilmoqda
Murojaatchining ta’kidlashicha, lavozimga tayinlanganiga atigi ikki kun bo‘lgan yangi rahbar mehnat ta’tilida bo‘lgan xodimlarga noqonuniy ravishda ruhiy va xizmat bosimini o‘tkazmoqda.
Murojaatda aytilishicha, tashkilot rahbariga 10-15 nafar amaldagi xodimlarni “zakaz” bo‘yicha majburiy ravishda ishdan bo‘shatish topshirig‘i berilgan va u hozirda shuni amalga oshirishga kirishgan.
Xodimlar va rahbar o‘rtasidagi audiosuhbatda direktorning o‘z xodimiga nisbatan ochiqdan-ochiq tajovuzkorona muomalada bo‘lgani va haqoratli iboralarni qo‘llagani eshitiladi. Mehnat ta’tilida ekanini va sog‘lig‘i sababli shifokor nazoratida turganini aytgan xodimga rahbar rasmiy chaqiruv qog‘ozisiz do‘q-po‘pisa qilib, “Mendan prav so‘rama”, “Yoqmasa sur”, “Qoningni ichaman” degan tahdidli gaplar bilan bosim o‘tkazgan.
Suhbat davomida xodim o‘z mehnat huquqlarini talab qilib, har qanday chaqiruv rasmiy buyruq va xat orqali bo‘lishi kerakligini ta’kidlagan bo‘lsa-da, yangi rahbar kasb etikasi va mehnat qonunchiligini chetlab o‘tib, ochiqdan-ochiq g‘ayriqonuniy talablarni ilgari surgan.
Ushbu holat yuzasidan murojaatchi Ichki ishlar, Suv xo‘jaligi vazirligi, Mehnat inspeksiyasi, Davlat xavfsizlik xizmati kabi qator tashkilotlarga murojaat qilgan. Tahririyat bilan muloqotda Suv xo‘jaligi vazirligi matbuot kotibi vaziyat viloyat boshqarma boshlig‘i tomonidan o‘rganilayotganini ma’lum qildi.
Tegishli mutasaddi idoralar va Mehnat inspeksiyasidan rasmiy munosabat kutib qolamiz.
