Qashqadaryoning baland tog‘lariga ilk qor yog‘di
Ekologiya va iqlim o‘zgarishi milliy qo‘mitasi huzuridagi Muhofaza etiladigan tabiiy hududlar departamentining ma’lum qilishicha, ob-havoning sovishi ortidan qo‘riqxonaning Miraki va G‘elon bo‘limlarining baland tog‘li qismlari oppoq qor qatlami bilan qoplandi.
Ma’lumot o‘rnida, Hisor tizmasining shimoli-g‘arbiy qismida joylashgan ushbu davlat qo‘riqxonasi 1983-yilda tashkil etilgan. Uning asosiy vazifasi hududdagi noyob o‘simlik hamda hayvonot dunyosini asrash, tabiiy jarayonlar va ekotizimni o‘rganishdan iborat.
Umumiy maydoni 80 ming gektardan ortiq bo‘lgan mazkur muhofaza hududi G‘elon, Miraki, Tanxozdaryo va Qizilsuv bo‘limlariga bo‘linadi. Qo‘riqxona hududining 24 ming gektardan ziyod qismini o‘rmonlar, 35 ming gektardan ortig‘ini esa tik qoyalar, muzliklar va baland tog‘ tizmalari tashkil etadi.
