Qashqadaryoda 9 ta mashina ishtirokida zanjirli YTH sodir bo‘ldi
Qashqadaryo viloyati IIB JXX YHXB Axborot xizmatining xabar berishicha, voqea kecha, 3-iyul kuni soat 14:30 larda Shahrisabz tumani hududidan o‘tuvchi 70V010 avtomobil yo‘lining 22-kilometrida yuz bergan.
Tormozi pand bergan yuk mashinasi zarbidan yo‘ldagi quyidagi 9 ta transport vositasi – 2 ta Lacetti, Tracker-2, Nexia-1, Nexia-3, Matiz, Damas, Spark jiddiy pachaqlangan va zanjirsimon tarzda bir-biriga urilgan.
Kuchli to‘qnashuv zarbidan so‘ng, yo‘ldagi Nexia-1 rusumli avtomobil nazoratni yo‘qotib, yo‘l chetida ketayotgan piyodani turtib yuborgan. Baxtli tasodif tufayli voqea joyida halok bo‘lganlar yo‘q. Jabrlangan piyodaga shifokorlar tomonidan zudlik bilan birinchi tibbiy yordam ko‘rsatilgan va shifoxonaga yetkazilgan.
Hozirda mazkur yirik yo‘l-transport hodisasi yuzasidan viloyat IIB JXX YHXB mas’ul xodimlari tomonidan surishtiruv va tergovga qadar tekshiruv ishlari olib borilmoqda.
