Qarzlarga botgan “Bunyodkor”ni qutqarish uchun xayriya yig‘ish boshlandi
Poytaxtdagi eng yirik sport inshootlaridan biri bo‘lgan “Bunyodkor” stadioni hamda uning qoshidagi klub chuqur moliyaviy inqirozni boshdan kechirmoqda. Ular nafaqat ishchilarining maoshi, soliqlar va kommunal to‘lovlardan, balki yaqinda o‘tkazilgan konsertdan so‘ng maysazorni qayta tiklab bergan pudratchi kompaniyadan ham qarzdor bo‘lib qolgan. Pul yetishmovchiligi oqibatida hatto yangi yotqizilgan maysazor ham qarovsizlikdan qurib qolish yoqasiga kelgan.
Vaziyat elektr energiyasidan to‘planib qolgan qariyb 2 milliard so‘mlik qarzdorlik sababli yanada og‘irlashdi. Shu bois joriy yilning 4-sentyabr kunidan e’tiboran stadion butunlay chiroqdan uzib qo‘yilgan. Daromad topish ilinjida binolarni ijaraga berishga o‘tgan majmuani endilikda elektr yo‘qligi sababli ijarachilar ham birin-ketin tark eta boshladi.
Mavjud murakkab sharoitdan chiqib ketish hamda stadionga elektr ta’minotini qaytarish maqsadida jamoatchilik va ishqibozlarga murojaat qilindi.
DOMO ilovasining xayriya bo‘limi hamda maxsus internet sayti orqali “Bunyodkor” stadionini qutqarish uchun ixtiyoriy pul o‘tkazmalari yig‘ish kampaniyasiga start berildi.
Avvalroq “Bunyodkor” futbol klubi nega inqirozga uchragani haqida material e’lon qilingan edi.
