Prokuratura 7 oyda OAV o‘rganishidan so‘ng 17 nafar shaxsni javobgarlikka tortdi
2026-yilning dastlabki 7 oyida prokuratura organlari tomonidan qonunchilik targ‘iboti va jamoatchilik bilan muloqot doirasida 95 mingdan ortiq tadbir o‘tkazildi. Bu haqda Bosh prokuratura ma’lum qildi.
Qayd etilishicha, shu davrda 95 792 ta qonunchilik targ‘iboti tadbiri tashkil etilgan. Shuningdek, xalq deputatlari Kengashlari va fuqarolarning o‘zini o‘zi boshqarish organlariga 575 ta hisobot taqdim etilgan.
Bosh prokuraturaning rasmiy veb-saytida 1 753 ta material, ijtimoiy tarmoqlardagi rasmiy sahifalarda esa 5 259 ta xabar, videorolik va infografika e’lon qilingan. OAV vakillari va jurnalistlarning 300 ga yaqin og‘zaki hamda yozma so‘rovlariga izoh berilgan.
Shuningdek, prokuratura aralashuvini talab qilgan 800 ga yaqin tanqidiy material o‘rganilgan. OAVda ko‘tarilgan muammolarni o‘rganish natijasida 17 nafar shaxs intizomiy va ma’muriy javobgarlikka tortilgan, 10 ta taqdimnoma kiritilgan va 15 ta jinoyat ishi qo‘zg‘atilgan.
Ko‘rilgan choralar natijasida 55 nafar fuqaroning buzilgan huquqlari tiklangan.
