Prezident vazirlar, hokimlar va Allamjonovni ham davlat mukofotlari bilan taqdirladi
Prezident farmoniga binoan, taqdirlanganlar safidan vazirlar, hududlar hokimlari, tadbirkorlar, konchilar, uchuvchilar hamda yoshlar yetakchilari o‘rin olgan. Xususan, Qashqadaryo viloyati hokimi Murotjon Azimov, Farg‘ona viloyati hokimi Xayrullo Bozarov, Toshkent shahar hokimi Shavkat Umurzakov va Islom sivilizatsiyasi markazi direktori Firdavs Abduxoliqov “Fidokorona xizmatlari uchun” ordeni bilan siylandi.
Davlat boshqaruvi va diplomatiya sohasidagi xizmatlari uchun bir qator mas’ul shaxslar “Do‘stlik” ordeniga loyiq ko‘rilgan. Ular orasida Prezident Administratsiyasi Rahbarining o‘rinbosari Tamila Aliyeva, Prezident matbuot kotibi Sherzod Asadov, Administratsiyaning AQSHdagi vakili Komil Allamjonov, investitsiyalar, sanoat va savdo vaziri Laziz Qudratov hamda “O‘zavtosanoat” raisi Ulug‘bek Ro‘ziqulov bor.
Shuningdek, ko‘plab ishlab chiqarish korxonalari va hududiy boshqaruv xodimlari “Mehnat shuhrati” ordeni bilan taqdirlandi.
Mukofotlar sirasida ishlab chiqarish va geologiya fidoyilariga berilgan faxriy unvonlar ham alohida o‘rin egallaydi. Jumladan, NKMK Markaziy kon boshqarmasi direktori Otabek Mustakimov hamda “O‘zmetkombinat” po‘lat erituvchisi G‘ulomjon Turanovga “O‘zbekiston Respublikasida xizmat ko‘rsatgan sanoat xodimi” unvoni topshirildi.
Shuningdek, qurilish, transport, aviatsiya hamda irrigatsiya yo‘nalishida mehnat qilayotgan soha mutaxassislari “Sodiq xizmatlari uchun”, “Jasorat” va “Shuhrat” medallari bilan mukofotlandi.
Aholi bilan yaqindan muloqot qilish tizimini samarali yo‘lga qo‘yganligi hamda hududlarda tadbirkorlik va mahallabay ishlash tajribasini faollashtirgani uchun Namangan viloyati hokimi Shavkat Abdurazzoqov, Buxoro viloyati hokimi Botir Zaripov hamda Koson tumani hokimi Asrol Boykarayev “Mehnat shuhrati” ordeni bilan mukofotlangan.
Tumanlar kesimida esa G‘allaorol tumani hokimi Jalolitdin Okboyev II darajali “Shon-sharaf”, Chust tumani hokimi Baxtiyorjon Salimjonov “Do‘stlik” hamda Jondor tumani hokimi Jamshid Xudoyev “Mardlik” ordeni bilan siylandi.
Xususan, oilalarda sog‘lom muhitni qaror toptirishdagi xizmatlari uchun Namangan viloyati hokimi o‘rinbosari Dinora Yakubova I darajali “Sog‘lom avlod uchun” ordenini qo‘lga kiritgan. Samarqand viloyati hokimi o‘rinbosari Rustam Kobilov “Do‘stlik”, Surxondaryo viloyati hokimi o‘rinbosari Alisher Amirov esa “Mardlik” ordeniga sazovor bo‘ldi.
Poytaxt ma’muriyatida uzoq yillar samarali faoliyat yuritib kelayotgan Toshkent shahar hokimining maslahatchisi Abduqahhor To‘xtayevga “O‘zbekiston Respublikasida xizmat ko‘rsatgan yoshlar murabbiysi” faxriy unvoni loyiq ko‘rilgan.
